कोरबा से कृष्णा देवी कारकेल की रचना- टुरा बिगड़ गेहे रे

कवयित्री-कृष्णा देवी कारकेल

राज्य-छत्तीसगढ़

जिला-कोरबा

विधा- काव्य

विषय -"टुरा बिगड़ गेहे रे..."

**********************

दाई- दादा के बात नई माने,मनमानी अपन करथे रे।

जेती जाबे तेती कहत सुनबे , टुरा बिगड़ गेहे रे ।।2।।

नान-नान लोग-लइकामन , गुटखा बिड़ी सिगरेट फूकत हे रे।

एक-दूसर के देखा-देखी,दारू-गांजा घलव पियत हे रे।।

पढ़ाई-लिखाई ल छोड़के,गली-गली किंजरत हे रे।

थोरकुन सोचव घलव जी,काबर टुरा बिगड़ गेहे रे।।2।।

गाड़ा-गाड़ा पइसा देके,चिरहा-फटहा पैंट लेवत हे रे।

चुंदी फकवाए जाथे आऊ , कुकुरा-चुन्दा मुड़ी हलावत आथे रे।।

रंग-रंग के जिनिस खाथे, घूमे-फिरे बर पइसा माँगथे रे।

नई देबे त आँखी देखाथे, कइसे टुरा बिगड़ गेहे रे।।2।।

रात भर टुरा मोबाइल कोचकथे , बिहनिया लात तान के सुतथे रे।

पबजी खेलथे धन कोनो ल गोठियाथे , कोन जानी टुरा ल का होगे रे।।

दुनिया के चकाचौंध म आगू आ गयन,आऊ संस्कृति ल भूला गयन रे।

दाई-बबा के कथा-कहानी,आऊ संस्कार हर बिसरागे रे।।

इखरे खातिर रे संगी,टुरा बिगड़ गेहे रे।।2।।

**********************

कृष्णा देवी कारकेल

डीएम.- 89 ओमपुर रजगामार, जिला-कोरबा (छत्तीसगढ़)