बिलासपुर से मोहित साहू की रचना- बार देबे दिया

नाम :- मोहित साहू

जिला :- बिलासपुर छग

शीर्षक :- बार देबे दिया..

विधा :- गीत

-------------------------------

रे सुरूज देवता बार देबे, दिया मोरो डीह म

आगे हावय सुरूहुत्ति देवारी,

रे सुरूज देवता बार देबे, दिया मोरो डीह म

1- फूटहा कुरिया हे हमरो नसीब के

के टूटहा छांधी हे मोरो गरीब के

बदनसीबी ल मोरो तैं मार देबे

रे सुरूज देवता बार देबे दिया मोरो डीह म

2- लइकन मन ह रो रो के सुसकत हे

सुरसूरी फटाका बर कुलकत हे

के मोरो लइकन ल मया दुलार देबे

रे सुरूज देवता बार देबे दिया मोरो डीह म

3- दिया बारे बर घर म तो तेल नइ हे 

बाती संग दिया के भी मेल नइ हे 

के चंदा ल कही दे अंजोर देबे 

रे सुरूज देवता बार देबे दिया मोरो डीह म 

4- सब घर म हावय रे खोवा मिठाई 

मोर घर म नइ हे बताशा अउ लाई

तोर दया के मधुरस ल ढार देबे 

रे सुरूज देवता बार देबे दिया मोरो डीह म 

5- डेहरी म बइठे जोहत होहय

मोरो खरतरीन रोवत होहय

अपन किरपा ले हमला उबार देबे 

रे सुरूज देवता बार देबे दिया मोरो डीह म 

आगे हावय सुरूहुत्ति देवारी 

रे सुरूज देवता बार देबे दिया मोरो डीह म 

-------------------------------

मोहित साहू