जिले का नाम:- मुंगेली(छत्तीसगढ़)
शीर्षक:- समय होत बलवान
विधा:- सार छंद/छन्न पकैया
समय होत बलवान
छन्न पकैया छन्न पकैया, करतब गजब दिखाथे।
समय बड़ा बलवाना संगी, सब ला नाच नचाथे।।
छन्न पकैया छन्न पकैया, राजा हो या परजा।
कखरो घर मा सोन भरे हे, कोनो खाथे करजा।।
छन्न पकैया छन्न पकैया, अइसे बेरा आथे।
फूल बरोबर छाती मा जी, पथरा लाद कमाथे।।
छन्न पकैया छन्न पकैया, सबके मुड़ मा लागा।
कखरो मुड़ मा दुख भारी हे, कखरो मा सुख पागा।।
छन्न पकैया छन्न पकैया, सबके गोठ ल सुनहू।
कोन छोट हे कोन बड़े हे, मन मा झन तो गुनहू।।
छन्न पकैया छन्न पकैया, मनखे ले झन दुरिया।
कखरो बाँटा महल अटारी, कखरो छितका कुरिया।।
छन्न पकैया छन्न पकैया, झन कर गरब गुमाना।
सबके पारी अाथे संगी, जस ला थोक कमाना।।
नागेश कश्यप।।
No comments:
Post a Comment