बलौदाबाजार से संतराम कुम्हार की रचवा- गाँव

रचनाकार -  संतराम कुम्हार 

   जिला -  बलौदाबाजार (छ. ग.) 

   शीर्षक  -  " गाँव के सुरता "

     विधा - छंदमुक्त  

------------------------------  

बर पीपर के छांव,

अब्बड़ सुग्घर मोर गाँव। 

पहली रखे जहां पांव, 

सेन्दुरस मोर गाँव।। 

हंसी ठिठोली के ओ दिन संगी हो, 

मोला बिक्कट सुरता आथे जी। 

बांटी-भौंरा के दिन नंदा गे, 

अब मोबाइल म दिन पहाथे जी।। 

बिहनिया बिहनिया के बेरा संगी हो, 

मोला निच्चट मन ल भाथे जी। 

चिरई चुरगुन के कोयली बोली सुन के, 

मोर दाई ह मोला उठाथे जी।। 

बड़का दाई ह घलो अब जंगावत हे। 

चहा पीये बर मोला बलावत हे।। 

बेटा तैं उठ, बेरा ह अब पहावत हे, 

ओ दे सुन तो, खईरखा ह घलो ढिलावत हे। 

झउहाँ ल धर के नोनी ह चल दिस, 

एक चोंता करिया बइला ह हागिस, 

जोर-जोर से चिल्लावत हे।। 

पताल के चटनी सील-लोढ़हा म पीसें, 

बने हे अंगाकर रोटी। 

भात रांधे बर निमार घलो डारें,

चाऊर ले कोदो-गोंटी।। 

दाई चटनी ह अब्बड़ मिठावत हे। 

मन हर खाय बर बिक्कट खंखावत हे।। 

अन्हां ह घलो आगिस, 

चाऊर ल तैं डाल देबे। 

कोठना के पानी ह सिरागे, 

कांदी ल तैं लान देबे।।

नंगरइया मन अब काम बुता म जावत हे। 

नांगर फांदे बर तोर तो जाँगर ह सिरावत हे।।     

     

-------*****-------