छत्तीसगढ़ के बालोद से शैलेन्द्र चेलक की रचना- बचपन

रचनाकार - शैलेन्द्र चेलक

पता - पेंडरवानी , बालोद ,छ.ग.

विधा - कविता (छत्तीसगढ़ी में)

शीर्षक - यादें बचपन की

----------------------------------------

      यादें बचपन की

गिल्ली -डंडा , बाटी - भौरा,

                   जम्मो संगी मितान ,

खेलन - खेल बर- पीपर तरी ,

                    दउड़-दउड़ मैदान,

अच्छा- बुरा नई समझन ,

                     जब रेहेन नादान ,

फेर नासमझी के दिन में संगी ,

                      सिमटे हे जहान ,

दांव देवत - लेवत ,

            झगड़न अउ चीड़हावन ,

उही करा घमासान ,

          अउ उही मेर मिल जावन ,

गर्मी दिन म , तरिया म ,

           कई घंटा डुबकी लगावन ,

रेस -टीप खेल संगे-संग ,

            भईसामन ल तउरावान ,

जाम अउ चिरईजाम ,

      जम्मो कच्चा -पक्का खावन ,

सिलपट्टा म पीस कूट के ,

           अमली के लाटा बनावन ,

बचपन के दिन बड़ सुघ्घर संगी ,

    मानो सरग के सुख हम पावन ,

जेन डाहर मत जाहू बरजे ,

               उही डाहर मा जावन ,

गांव के चारो मुड़ा ,

         रुख-राई जंगल कस छांव ,

घाम - घाम म घूम के मैं तो ,

               चिरई जाम बन जांव ,

गारी सुनके रे संगी ,

            खावन  जम्मो हकन के ,

बाड़ी वाला चिल्लावत दउड़े ,

           याद आथे वो बचपन के ,

बारिस म भींग-भींग ,

               डोंगा बनावन मन के ,

चिखला कस मिल के राहन ,

               याद आथे बचपन के ,

    

         - -  शैलेन्द्र चेलक - -