छत्तीसगढ़ के जशपुर नगर से सरस्वती चौहान के दोहे

श्रीमति सरस्वती चौहान

जिला- जशपुर नगर(छत्तीसगढ़)

शीर्षक- श्री राम दोहावली

मात्रा- 13,11

विधा-छंद

1.चैत मास के शुक्ल मा, जन्म अयोध्या धाम ।

पुरषोत्तम श्री राम के, निशदिन जपलव नाम ।।

2.राम राज सब घर रहै, मया भाव बगराव ।

लोभ-मोह ला त्याग दव, घर ला सरग बनाव ।।

3.वर माला धर जानकी, आवै धीरे धीर।

सुमरयँ मन मा राम ला, बोहावत हे नीर।।

4. राम नाम ला जाप लौ, मिट जाही सब पाप ।।

रोग शोक छूटे सबो,कट जाही संताप ।।

5.सिया राम हिरदे बसै, जय जय श्री हनुमान ।

संकट मोचन दुख हरौ, दया करव भगवान ।।

6.ये दुनिया मा कौन हे, काखर मिलही साथ ।

दुख के साथी राम हें, राम जी देहीं हाँथ ।।

7.ये दुनिया हे जान लौ, राम बिना बेकार ।

दया मया मन मा रहै, जिनगी के हे सार ।।

8. पाप पुण्य करके सबो, जावँय गंगा धोय ।

मन ला जी धोंवय नही, माफ कहाँ से होय ।।

9.धर्म काम अउ मोक्ष ला, रघुवर ले सब पाय ।

काम क्रोध भय लोभ ले, मन ला मुक्त कराय ।।

10. दया मया के बंधना, छूटय झन लव जान ।

बड़खा छोटे के इहाँ, राखव सब जन मान ।।