छत्तीसगढ़ से शैलेन्द्र चेलक की रचना- नवा बछर

नाम - शैलेन्द्र चेलक 

पता -पेंडरवानी ,बालोद ,छत्तीसगढ़

विधा - गीत 

शीर्षक - नवा बछर 

      -  नवा बछर -

----------------------------- 

नवा बछर के नवा दिन आगे ,

नवा -नवा सब निक -निक लागे ,

करम करैया हँसे - हँसाए ,

ठलहामन सोवत भुलाए ,

दाई- ददा , भाई -बहिनी मन ल ..

नवा - नवा , नवा दिन भा गे , नवा बछर ...

नवा बछर म नवा सुरुज ह ,

नवा जोत बगरावत हवे ,

चिरई -चुरगुन मन , अपन राग म ,

कई किसम के नाचत गावत हवे ,

फेर तै काबर पाछु हवस रे मनखे ..ss..

देख नवा बिहान आगे , नवा बछर . . .

नवा उमंग हे ,नवा तरंग हे ,

आगास म नवा नवा नवरंग हे ,

पाछु मत देख का खोए -पाए ?

कभू हँसे , कभू रोवत भुलाए ,

नवा रद्दा म चले बर संगी ...ss..

नवा परन ले ले आगू आ के , नवा बछर ...

जिनगी भर खुश रही भैया ,

मेहनत लगन ले काम करैया ,

किस्मत के रोना रोही ते पाछु पछताही जी ,

यहू बछर ह पाछु सही ,पंचांग बदलना रही जाही जी ,

तब खूब कमावव ,मजा उड़ावव 

धन समरिध ल पा के , नवा बछर ...

    

       -  शैलेन्द्र चेलक -