स्कूल खुले के दिन आवत हावय by श्रवण कुमार साहू"प्रखर"

💐💐💐💐💐💐💐💐
स्कूल खुले के दिन, आवत हावय।
गर्मी के छुट्टी, सिरावत हावय।।
चलव चलव न भाई-----------
जाबोन स्कूल ,पढ़े लिखे बर न।
1)अड़बड़ घुमेंन,खेले खाए हन।
  ममा -फूफू घर ,घलो जाए हन।।
झरे मोंगरा फूल,बाँचे हे काँटा।
अड़बड़ खाए हन,लौहा-लाटा।।
बिहाव के लाडू, घला खाए हन।
  अड़बड़ मजा,हमू पाए हन ।।
अब तो पढ़े लिखे के दिन ह आगे।
जाबोन स्कूल, पढ़े लिखे बर-----
2)जाबोन स्कूल, हमू ह पढ़बोन।
सुग्घर अपन जिनगी ल गढ़बोन।।
गुरूजी के मानबो, हमन कहिना।
सुन लेना भाई, सुन लेना बहिना।।
कलम -दवात ल,लेके जाबोन।
अनार आम ल,पढ़ के आबोन।
गिनती के ग्यान, अंग्रेजी के ध्यान।
बने हम पढ़बो, होबोन बिद्वान।।
अब तो घुमे फिरे के,दिन नंदागे।
जाबोन स्कूल, पढ़े लिखे बर-----
3)सुत उठ के पहिली,होबोन फ्रेश
खा पी के चलव,पहिरो स्कूल ड्रेस
जूता मोजा ल, घलव पहिरो।
स्कूल जाए बर, जल्दी से संवरो।।
लकर -धकर ,धर लो बस्ता।
स्कूल के तुमन ,नापो रास्ता।।
चल न नेहा, चल न बबली बंटी।
प्रार्थना करे के,लग गे घंटी।।
देख साहू गुरुजी फटफटी म आगे
जाबोन स्कूल ,पढ़े लिखे बर न--
4)हाजीरी लेहि, कक्षा म गुरुजी।
हमुमन कहिबो, जय हिंद गुरुजी।
पढ़बोन पुस्तक ,हम होके मगन।
पेट भर खाबोन,मध्यान्ह भोजन।।हमर जिनगी ल ,नई करन बेकार।
स्कूल म सिखबो,सभ्यता संस्कार।
नई होवन झगड़ा, न होवन लड़ई।
स्कूल म होथे जी,लईका मड़ई।।
सब कर लो ,महामाई के फेरा।
मोर स्कूल सुग्घर हे, सुन्दरकेरा।।
चलव चलव न भाई ------------
जाबोन स्कूल,पढ़े लिखे बर न ।।
रचनाकार💐💐
श्रवण कुमार साहू"प्रखर"
शिक्षक/साहित्यकार
शासकीय प्राथमिक विद्यालय सुन्दरकेरा, विकासखंड-अभनपुर,
जिला-रायपुर(छ. ग.)